Գյումրու տեղամասերում նկատելի է պասիվություն

Արագած մարզամշակութային կենտրոնում տեղակայված թիվ 33/68 հանրաքվեի տեղամասային կենտրոնում միայն հանձնաժողովի անդամներն էին ներկա գտնվում: Թեև վերջիններս վստահեցրեցին, որ մեր տեսանկարահանումից առաջ քվեարկողների խումբ եղել է: Պասսիվությունը հանձնաժողովականները փորձեցին պայմանավորել եղանակային ցուրտ ու վատ պայմաններով:

Հանրաքվեի տեղամասային հանձնաժողովի նախագահ տիկին Սաթենիկից էլ փորձեցինք ճշտել, թե տեսողական խնդիրներ ունեցող քաղաքացիների համար նախատեսված խոշորացնող ոսպնյակ կամ կույրերի համար տպագրված հատուկ կաղապարներ կենտրոնն ունի թե ոչ: Երկար փնտրտուքից և հանձնաժողովի քարտուղարին օգնության կանչելուց հետո նոր միայն պարագաները հայտնաբերվեցին:

Միևնույն հանդարտ և անխռով մթնոլորտն էր տիրում նաև Երևանի պետական ճարտարագիտական համալսարանի Գյումրու մասնաճյուղում տեղակայված 33/69 հանրաքվեի տեղամասային կենտրոնում: Հանրաքվեին մասնակցության ցուցանիշը ցածր է գնահատում հանրաքվեի տեղամասային հանձնաժողովի նախագահը: Իսկ թե պասսիվությունն ինչով է պայմանավորված, դժվարանում է պատասխանել:

81-ամյա ընտրողը չգիտի, թե ինչու է եկել տեղամասային կենտրոն: Նրան հետաքրքրում է ոչ ավել ոչ պակաս իր սոցիալական վիճակի բարելավումը:


Աղբյուր՝tsayg.am